Aşgabadyň atçylyk sport toplumynda güýzki at çapyşyklarynyň nobatdaky tapgyry geçirildi. Olarda ýetginjek we uly ýaşly çapyksuwarlar özaralarynda bäsleşdiler.
Türkmenistan Habarlar portalynyň habar bermegine görä, nobatdaky tapgyryň ilkinji çapyşygynda Sopyýewiň hojalygyna degişli bolan”Gözelim” atly bedewi ýeňiji boldy.
Ikinji çapyşykda Aşgabat şäher häkimliginiň “Şa Gül” atly bedewi pellehana ilkinji geldi. Üçünji çapyşykda aralyk 1000 metr boldy. Onda Ataýewiň hojalygyna degişli bolan “Hazar” atly bedew üstünlik gazandy. Babalyýewiň “Gözelsen II” atly bedewi dördünji çapyşygyň ýeňijisi boldy.
1400 metr aralyga guralan bäşinji çapyşyk hem gyzykly boldy. Bu çapyşykda Türkmenistanyň Prezidentiniň Ahalteke atçylyk toplumyna degişli bolan “Ýylan” atly bedewi birinji orna mynasyp boldy.
Altynjy çapyşykda Gowşanowyň hojalygyna degişli bolan ”Garadepel” atly bedew ýeňiş gazandy.
Ýedinji çapyşykda Ahal welaýatynyň Gökdepe etrabynyň Babarap daýhan birleşiginiň “Edermen” atly bedewi ýeňiji bolmagy başardy.
Bellenilen 1800 metr aralygy çalasynlyk bilen geçen Türkmenistanyň Prezidentiniň Ahalteke atçylyk toplumynyň “Tamala” aty bedewi sekizinji çapyşykda ýeňiş gazandy.
2200 metr aralyga guralan ýaryşyň 9njy çapyşygynda Türkmenistanyň Prezidentiniň Ahalteke atçylyk toplumynyň “Goşa sakar” atly bedewi birinji oruna mynasyp boldy. jemleýji onunjy çapyşykda Türkmenistanyň Prezidentiniň Ahalteke atçylyk toplumyna degişli bolan “Begzada” atly bedewi ýeňiş gazanmagy başardy.
