Amerikan himiýa jemgyýetiniň (ACS) alymlary aloeniň insektisid häsiýetleriniň bardygyny anykladylar. Barlaglaryň netijeleri ACS assosiasiýasynyň agzalarynyň her ýylda geçirilýän ýygnagynda tanyşdyrylar.
Barlagyň awtorlary ösümligiň ýapraklaryny we baldaklaryny gözden geçirdiler. Olarda çybynlary we beýleki mör-möjekleri ürküzip biljek alty maddanyň bardygy ýüze çykaryldy. Olaryň arasynda oktakozanyň molekulalary, şeýle hem nonadekonon, arjugenin, dinoterb, 2-geksil-1-dekanol we kwil kislotasy bar.
Bu maddalar aloe şiresinden taýýarlanylýan kosmetika önümçiliginiň galyndylaryndan döredilen zyýansyz pestisidleriň esasyny düzüp biler. Şeýlelik bilen, alymlar birbada iki meseläni çözýärler: ösümliklere esaslanýan önümçilik galyndysyz we has arzan bolar, mör-möjeklere garşy serişdeler bolsa ekoulgama we adamyň saglygyna howp salmaz.
Alymlar geljekde bu maddalaryň oba hojalygynda zyýankeşlere garşy hakyky meýdanlarda näderejede täsirlidigini barlarlar. Mundan başga-da, awtorlar aloeni tagtabitlerine garşy göreşde ulanmagyň mümkinçiligini barlamak isleýärler.
