2025-nji ýylyň Osakada geçiriljek Bütindünýä sergisi üçin pawilýonlaryň gurluşygyny çaltlaşdyrmak meýilnamasy bu çäräni guraýan ýapon assosiasiýasy tarapyndan teklip edildi. Bu barada NHK teleýaýlymy habar berýär diýip, rossaprimavera.ru belleýär.
Serginiň 2025-nji ýylyň aprel aýynda açylmagy göz öňünde tutulýar, ýöne gurluşyk prosesi eýýäm meýilnamadan yza galdy. Halkara subýektleriniň 153 wekiliniň forumyň meýdançalarynda öz pawilýonlaryny gurmagyna ýa-da guramaçylaryň taýýar çözgütlerini ulanmagyna garaşylypdy.
Ýöne gurluşyk prosesi käbir ýagdaýlarda meýilnamadan yza galýar. Şunuň bilen baglylykda, guramaçylar şeýle pawilýonlary gurmak işini beýleki ýurtlara geçirmegi teklip etdiler. Ýagny, gatnaşyjylaryň ähli çykdajylary öz üstüne almagy we şol bir wagtyň özünde obýektleriniň hem daşarky, hem içerki dizaýnyna gözegçilik etmegi göz öňünde tutulýar.
Habar berlişi ýaly, şeýle meýilnama bilen 50-den gowrak gatnaşyjy razylaşdy, ýöne häzirlikçe diňe Günorta Koreýa zerur resminamalary berdi.
Bellenilişi ýaly, Ýaponiýanyň Ykdysadyýet, söwda we senagat ministri Ýasutosi Nisimura işgärleri bilen duşuşygynda serginiň daşary ýurtly gatnaşyjylary bilen ýerli gurluşyk kompaniýalarynyň arasynda degişli şertnamalary baglaşmak prosesini çaltlaşdyrmagy tabşyrdy.
Ýaponiýaly telekeçilere goşmaça goldaw bermek üçin ministrlik degişli şertnamalary baglaşmagy ýeňilleşdirjek ätiýaçlandyryş ulgamyny girizýär. Bu ulgam sergä gatnaşyjy tölemedik ýagdaýynda gurluşyk kompaniýasynyň çekjek ýitgisiniň köp bölegini ýa-da ählisini ýapmalydyr.
Ýatlap geçsek, Osakadaky Expo-2025 sergisi üçin pawilýonlaryň gurluşygy bilen bagly mesele Ýaponiýanyň öz pawilýonynda hem ýüze çykdy. Hökümet söwdanyň dowamynda desgany gurjak potratçyny tapyp bilmedi – ähli dalaşgärler has ýokary bahany teklip etdiler.
Ýaponiýanyň pawilýonynyň gurluşygy 12-nji iýunda başlap, 19 aý dowam etmelidi. Gurluşygyň gijä galmak ähtimallygy sebäpli hökümet täze söwda işine başlamagyň deregine işi tamamlamagy borçlandyrýan şertnama gol çekdi.
Şeýle mesele bilen ýüzbe-ýüz bolan beýleki sergä gatnaşyjylar ýa-ha bahany ýokarlandyrdylar, ýa-da öz desgalarynyň dizaýnyny ýönekeýleşdirdiler.
