Formula E açyk tekerlerde awtoulag çempionatynyň guramaçylary Ginnesiň rekordlar kitaby tarapyndan resmi taýdan bellige alnan ýapyk binada täze tizlik rekordynyň goýlandygyny yglan etdiler. Serianyň iki piloty ýeňiş üçin göreşdi we ilkinji gezek ýörite taýýarlanan awtoulagy dolandyrmaly boldular. Ikisi-de türgenleşik wagtynda öňki çempiondan ep-esli öňde barýardy, iň gowy görkeziji sagatda 218,71 km boldy.
Ýaryşlar şu hepdäniň ahyrynda häzirki “Elektroformula” möwsüminiň soňky tapgyry geçiriljek Beýik Britaniýanyň paýtagtyndaky ExCeL London sergi merkeziniň çäginde geçirildi. 2,09 kilometrlik täsin ýol binanyň içinden bölekleýin geçýär. Bäsleşige gatnaşyjylar Jeýk Hýuz (McLaren) bilen Lukas di Grassi (Mahindra Racing) 346 metrlik tekiz ýolda, üstesine, sagatda 40 km tizlik bilen 130 gradusly öwrümi geçmek bilen, kowuşdylar.
Sürüjiler Formula E -niň saýlama ýaryşlarynda ulanylýan duel görnüşinde bäsleşdiler. Jeýk Hýuz ilkinji türgenleşik mahalynda sagatda 214,8 km tizlik bilen resmi däl rekord eýesi boldy. Soňra bolsa netijesini iki gezek (215.05 we 217,65 km) gowulandyrdy we ýeke-täk resmi synanyşykda sagatda 218,71 km netijäni görkezip, munuň üçin Ginnesiň rekordlar kitabyna girizildi.
