14-nji iýulda geçirilen giňişleýin Hökümet mejlisiniň dowamynda Serdar Berdimuhamedow işde goýberen kemçilikleri üçin, N.Nyýazlyýewi «Türkmenhimiýa» döwlet konserniniň başlygy wezipesinden boşadyp, konserniň başlygy wezipesine Ahaldaky gazdan benzin öndürýän zawodyň direktory D.Sapbaýewi bellemek barada karara gelendigini aýtdy. Bu barada «Watan» habarlar gepleşiginde aýdyldy.
Wezipä täze bellenen ýolbaşçy bildirilen ynam üçin tüýs ýürekden hoşallyk bildirip, öňde goýlan möhüm wezipeleri ýerine ýetirmek üçin güýç-gaýratyny, tejribesini we bilimini gaýgyrmajakdygyna ynandyrdy.
Serdar Berdimuhamedow degişli resminamalara gol çekip, wise-premýer B.Annamämmedowa gurluşyk we senagat toplumynyň kärhanalarynyň bökdençsiz işledilmegini gazanmak üçin zerur çäreleri geçirmegi, himiýa kärhanalaryny doly kuwwatyna çykarmak boýunça alnyp barylýan işleri güýçlendirmegi tabşyrdy.
