Tesla kompaniýasy Hindistanyň hökümetine ýurtda öz awtoulag önümçiligini ýerleşdirmek üçin maýa goýum teklibini iberdi, gepleşikler dowam edýär. Bu barada penşenbe güni The Times of India habar berdi.
"Tesla bize ägirt uly meýilnama hödürledi we bu gezek gepleşikleriň üstünlikli boljakdygyna ynanýarys, esasanam, kompaniýanyň teklibi önümçiligini ýerleşdirmegi we eksporty (üçünji ýurtlara) göz öňünde tutýandygyny nazara almak bilen şeýle diýýäs" diýip, neşir Hindistanyň hökümetiniň anonim wekiliniň sözlerini getirýär.
Söwda we senagat ministrligi hindi hökümetiniň adyndan gepleşik geçirýär. Neşiriň habaryna görä, Tesla ýylda 500 000 awtoulag öndürýän zawod gurmagy teklip edýär. Öndüriljek modelleriň iň pes bahasy 25 000 dollar töweregi bolar.
Ondan öň, Tesla Hindistana elektrik ulaglaryny import etmekden alynýan paçlary azaltmaga synanyşdy, emma Nýu-Deli muny ret etdi we kompaniýa önümlerini ýurda eksport etmek meýilnamalaryndan wagtlaýynça ýüz öwürdi. Maý aýynda Teslanyň baş direktory Ilon Mask "The Wall Street Journal" gazetine beren interwýusynda: "Kompaniýanyň daşary ýurtlarda gurjak täze zawody üçin Hindistanyň gyzykly ýer bolup biljekdigini" we 2023-nji ýylyň ahyryna çenli kararyň kabul ediljekdigini aýtdy. Iýun aýynda Mask Waşingtonda Hindistanyň premýer-ministri Narendra Modi bilen duşuşdy we duşuşygyň ahyrynda "Tesla Hindistanda peýda boljakdygyna we munuň mümkin boldugyça çalt amala aşjakdygyna" ynam bildirdi.
