Şu gün, 19-njy iýunda Prezident Serdar Berdimuhamedow Fransiýa Respublikasynyň Türkmenistanda täze bellenen Adatdan daşary we Doly ygtyýarly ilçisi Filipp Merleni kabul etdi. Bu barada «Watan» habarlar gepleşiginde habar berildi.
Diplomat wagt tapyp kabul edendigi üçin hoşallygyny bildirip, döwlet Baştutanyna ynanç hatyny gowşurdy hem-de öz ýurdunyň Prezidenti Emmanuel Makronyň mähirli salamyny we ähli türkmen halkyna bagtyýarlyk, abadançylyk we rowaçlyk baradaky arzuwlaryny ýetirdi.
Serdar Berdimuhamedow Fransiýa Respublikasynyň doly ygtyýarly wekilini gadymy we myhmansöýer türkmen topragynda mübärekläp, jogapkärli diplomatik wezipä bellenilmegi bilen gutlady hem-de iki döwletiň arasyndaky dostlukly gatnaşyklary mundan beýläk-de ösdürmek we pugtalandyrmak işinde uly üstünlikleri arzuw etdi.
Döwlet Baştutany Türkmenistan bilen Fransiýanyň arasyndaky söwda-ykdysady hyzmatdaşlyk barada aýdyp, fransuz kompaniýalarynyň köp ýyllaryň dowamynda milli ykdysadyýetimiziň pudaklarynyň ösüşine goşan aýratyn goşandyny belledi. Gurluşyk, nebitgaz we aragatnaşyk ulgamlaryndaky hyzmatdaşlyk üstünlikli giňeldilýär.
Maglumat-tehnologiýalar, nebitgaz, himiýa, azyk senagaty ulgamlary hyzmatdaşlygyň ileri tutulýan ugurlarynyň hatarynda görkezildi. Şunuň bilen baglylykda, Ykdysady hyzmatdaşlyk boýunça hökümetara türkmen-fransuz toparynyň möhüm orny bellenildi. Bu topar anyk maksada gönükdirilen gepleşikleri geçirmeli hem-de iki ýurduň döwlet edaralarynyň we hususy ulgamynyň tagallalaryny utgaşdyrmaga has işjeň gatnaşmalydyr.
