Prezident Serdar Berdimuhamedow Onuň Alyjenaby, Beýik Britaniýanyň we Demirgazyk Irlandiýanyň Birleşen Patyşalygynyň Patyşasy Karl III-ä onuň resmi ýaş toýy mynasybetli mähirli gutlaglaryny, iň gowy arzuwlaryny ýollady.
«Biz Türkmenistan bilen Beýik Britaniýanyň we Demirgazyk Irlandiýanyň Birleşen Patyşalygynyň arasynda ýola goýlan dostlukly gatnaşyklara uly ähmiýet berýäris. Ýurtlarymyzyň arasyndaky dostlukly gatnaşyklaryň, netijeli hyzmatdaşlygyň mundan beýläk-de giň ugurlar boýunça ösdüriljekdigine we pugtalandyryljakdygyna ynanýarys» diýip, döwlet Baştutany gutlag hatynda nygtady.
Britan monarhlary iki doglan gün belleýärler — hakyky we resmi (hemişe iýun aýyna düşýär).
Bu däp 1748-nji ýyldan we Patyşa Georg II-den gözbaş alýar. Ol noýabr aýynda doglandygyna garamazdan, her ýylky Trooping the Colour dabarasyny öz doglan güni bilen utgaşdyryp belläpdir. Şol wagtdan bäri hem britan monarhlary resmi doglan günlerini tomusda uludan belleýärler. Çünki bu döwürde howa has ýakymly bolýar.
