2023-nji ýylyň 8-9-njy iýunynda Lebap welaýatynyň Türkmenabat şäherindäki «Zehin ýoly» okuw merkeziniň guramagynda Türkmenistan boýunça II Anzan Mega Mental Arifmetika Olimpiadasy geçirildi.
Olimpiada jemi 65 adam gatnaşyp, şolaryň 29-sy rekord goýmaga gatnaşdy. Olaryň arasynda hem milli rekord goýmak boýunça bäsleşik geçirildi. Rekord bäsleşiginde Aşgabat şäheriniň 2-nji orta mekdebiniň okuwçysy Ogulmaral Altyýewa birbada üç kategoriýa boýunça rekord goýmagy başaryp, 3-sany altyn medalyň eýesi boldy. Şeýle hem bu ýaryşda Ogulmaral özüniň ukyp başarnygy boýunça has çynlakaý çemeleşip, öňki rekordsmeniň rekordyny uly ballar bilen täzelemegi başardy.
Ýagny, Ogulmaral Altyýewa şularyň hötdesinden geldi:
- Çalt Flash Anzan (Speed Flash Anzan) kategoriýada 0,3 sekunt tizlik bilen geçýän jemi 100 sany 2 belgili sany 5 gezek yzly-yzyna dogry goşmagy başardy.
- Iň çalt ýatdan goşmak (Fastest Mental Addition) kategoriýada 25,24 sekuntda random gelen 100 sany sany 3 gezek yzly-yzyna dogry goşdy.
- «Flash Anzan» (Flash Anzan Marathon) marafony kategoriýada 14 107 bal toplap rekord goýdy.
Belläp geçsek, Ogulmaral Altyýewa 2022-nji ýylyň 27-nji noýabrynda Aşgabatda «Kämil Bilim» okuw merkezinde geçen Türkmenistan boýunça I Anzan Mega Mental Arifmetika Olimpiadasynyň umumy ýaryşynda hem birinjiligi eýeläp, altyn medala mynasyp bolupdy.
Ogulmaral Altyýewa okuwdan boş wagtlary Aşgabat şäherindäki «Kämil Bilim» okuw merkeziniň Anzan Mega Mental Arifmetika kursunyň utgaşdyryjysy Döwletmyrat Durdymämmedowyň garamagynda bilim alýar.
