Tokionyň häkimiýeti ChatGPT emeli aň esasly çat-boty awgust aýyndan başlap şäheriň ähli edaralarynyň işine ornaşdyrar. Bu barada sişenbe güni Tokionyň gubernatory Ýuriko Koike žurnalistlere habar berdi.
"[ChatGPT]-ni ulanmak ähli edaralarda awgust aýynda başlar – diýip, Kyodo agentligi gubernatoryň sözlerini getirýär. – Bu innowasiýa tehnologiýasynyň artykmaçlyklaryny ornaşdyrmak we ýetmezçiliklerini nazarda tutmak bilen biz birtopar administatiw bölünmelerimizde ulanylmagyny öňe sürmegi niýet edinýäris”. Koikeniň sözlerine görä, ChatGPT-iň, hususanam, resminamalary taýýarlamakda we ýerli ilat üçin habar býulletenlerini taýýarlamakda ulanyljakdygyny aýtdy.
Ondan öň Ýaponiýanyň Dolandyryş we aragatnaşyk ministri Takeaki Masumoto öz edarasynyň gündelik işlerinde ChatGPT-ni ulanmaga synanyşjakdygyny mälim edipdi. Öz gezeginde, Ykdysady howpsuzlyk ministri Sanae Takaiti hem ýerli häkimiýetleriň ChatGPT we emeli aň esasly beýleki programmalary ulanmagy dessine gadagan etmek ýa-da başgaça düzgünleşdirmek niýetiniň ýokdugyny belledi.
Amerikanyň OpenAI kompaniýasynyň ChatGPT-si 2022-nji ýylyň ahyrynda işe girizildi. Hyzmat ulanyjy bilen gepleşik tertibinde aragatnaşyk saklaýar. Çat-bot goşmaça soraglara jogap berip, ýalňyşlyklaryny boýun alyp, nädogry ýerlerine garşy çykyp we ýerliksiz haýyşlary ret edip biler. Hyzmatyň mümkinçilikleri köpçüligiň ünsüni özüne çekdi. Täzelik dürli ýurtlaryň talyplary tarapyndan synag tabşyrmakda we akademiki resminamalary taýýarlamakda ulanylandan soň tankyt edildi.
