Amerikaly alym Jozef Dituri rekord 100 gün suwasty myhmanhanada ýaşandan soň anna güni ýokary çykdy diýip, interfax.ru habar berýär.
Günorta Florida uniwersitetiniň professory, “Doktor Çuň deňiz” hökmünde-de belli bolan Dituri Jules’Undersea Lodge myhmanhanasynda 100 gün boldy. Myhmanhana Florida ştatynyň Ki-Largo sebitinde bolup, takmynan, 6,7 metr çuňlukda ýerleşýär.
Ginnesiň rekordlar kitabynyň saýtynyň maglumatlaryna görä, Dituri asyl 13-nji maýda, ýagny suwuň aşagynda 74 gün bolandan soň rekordy täzeledi. Öňki rekord şol myhmanhanada 73 gün 2 sagat 34 minut bolan Jessika Feýn we Brýus Kantrell tarapyndan goýlupdy.
Dituri ýokarlandyrylan basyşyň organizme uzak möhletleýin täsirini öwrenmek üçin suwuň aşagynda 100 gün bolmagy maksat edindi.
Jules’Undersea Lodge suwuň aşagynda ýerleşen ýeke-täk amerikan myhmanhanasydyr. Onuň meýdany, takmynan, 9,2 inedördül metre barabar. Onda atmosfera basyşy ýeriň üstündäkiden 70% ýokarydyr.
