Türkiýäniň prezidenti Rejep Taýyp Ärdogan, esasy ministrlikleriň ýolbaşçylaryny hem öz içine almak bilen, hökümetiň tutuş düzümini diýen ýaly çalyşdy. Ol şenbe güni Respublikanyň hökümetiniň täze düzümini yglan etdi.
Daşary işler ministri wezipesine 2010-njy ýylyň maý aýyndan bäri Milli aňtaw guramasyna ýolbaşçylyk eden, aňtaw gullugynyň başlygy Hakan Fidan bellendi. Milli Goranmak ministrligine Baş ştabyň başlygy bolup işlän general Ýaşar Gýuler ýolbaşçylyk eder. Içeri işler ministri wezipesine 2018-nji ýyldan bäri Stambul welaýatynyň häkimi bolup işleýän we ondan ozal Gaziantep welaýatyna ýolbaşçylyk eden Ali Ýerlikaýa bellener. Maliýe ministri hökmünde ýurduň ykdysadyýetindäki çylşyrymly ýagdaýy çözmek üçin bu wezipä Mehmet Simşek çagyryldy. Ol bu wezipäni 2009-2015-nji ýyllarda hem alyp barypdy we ondan öň Ykdysady meseleler boýunça döwlet ministri wezipesini-de eýeläpdi (2007-2009). Owal Energetika ministriniň orunbasary bolup işlän Alparslan Baýraktar Energetika we tebigy gorlar ministrligine ýolbaşçylyk eder.
Ärdogan, ozal wada berişi ýaly, "bir orunbasar ýeterlik" diýip, wise-prezidentleriň sanyny köpeltmedi, ýöne bu wezipedäki Fuat Oktaýyň ornuna başgasyny bellär. Ozal hökümet agzasy bolan Jewdet Ýylmaz täze wise-prezident bolar. Ol 2009-2011-nji ýyllarda Döwlet ministri, 2011- 2016-njy ýyllarda - Türkiýäniň Ösüş ministri we Ykdysady meseleler boýunça wise-premýer bolupdy. 17 ministriň diňe ikisi - Fahrettin Koja (Saglygy goraýyş ministri) we Mehmet Nuri Ersoý (Medeniýet we syýahatçylyk ministri) öz wezipelerinde galdy.
