Türkiýäniň Prezidenti Rejep Taýyp Ärdogan, hereket edýän kanunlar boýunça, 28-nji maýda geçiriljek saýlawlarda ýeňiş gazanan ýagdaýynda üçünji möhlete saýlanyp bilmejekdigini aýtdy. Şeýlelik bilen, ol 2033-nji ýyla çenli Türkiýä baştutanlyk etmegi meýilleşdirýändigi ýa-da ýokdugy baradaky soraga jogap berdi diýip, centralasia.media belleýär.
“Häzirki düzgünlere laýyklykda, prezident diňe iki gezek saýlanyp bilner. Meniň birinji möhletim tamamlanyp barýar, häzir ikinji möhlete saýlanmak boýunça saýlawlar dowam edýär. Ikinji möhlete saýlanmak bilen bu proses tamamlanar” – diýip, Ärdogan CNN-e beren interwýusynda aýtdy.
Geçen ýyl türk oppozisiýasy Ärdoganyň täze möhlete dalaş edip bilmejekdigini, sebäbi 2018-nji ýylda, täze Konstitusiýa kabul edilenden soň we bu wezipede dört ýyl bolansoň, onuň möhletinden öň saýlanandygyny aýtdy.
Türkiýäniň Adalat ministrligi Ärdoganyň prezidentlige gaýtadan saýlanmaga hukugynyň bardygyny, sebäbi täze üýtgetmelere laýyklykda, kanuny taýdan iki däl-de, diňe bir saýlawa gatnaşandygyny, çünki onuň möhletiniň “hasapdan aýrylandygyny” belledi.
Ýatlap geçsek, 14-nji maýda Türkiýede prezident saýlawlarynyň birinji tapgyry geçirildi. Ärdogan 49,51% ses aldy. Onuň esasy bäsdeşi Kemal Kylyçdaroglu 44,88% ses aldy. Dalaşgärleriň ikisi-de 28-nji maýda geçiriljek ikinji tapgyra geçdi.
