Türkiýäniň diplomatik wekilhanasy Twitter sahypasynda 20-nji we 21-nji maýda Türkiýäniň Aşgabatdaky ilçihanasynyň binasynda prezident saýlawlarynyň ikinji tapgyry üçin ses berişlik geçiriljekdigini aýtdy.
Türkiýäniň ilçihanasy saýlawçy hökmünde hasaba alnan Türkmenistandaky raýatlaryny Aşgabat şäheriniň Görogly köçesiniň 9-njy jaýynda ýerleşýän saýlaw uçastogyna ses bermäge çagyrdy.
Saýlawlaryň birinji tapgyry 14-nji maýda Türkiýede geçirildi. Prezidentlige dalaşgärleriň hiç biri-de sesleriň 50% -ini alyp bilmedi, şonuň üçin 28-nji maýda ýurtda ses berişligiň ikinji tapgyry geçiriler. Ýatlatsak, Türkiýäniň häzirki prezidenti Rejep Taýyp Ärdoganyň, býulletenler 100% hasaba alnandan soň, 49,35% ses alandygy belli bolupdy. Kemal Kylyçdaroglu saýlawçylaryň 45% -i tarapyndan goldanyldy.
