15-nji maýda Türkmenistanyň Halk Maslahatynyň Başlygy Gurbanguly Berdimuhamedow ýurdumyzyň birnäçe wise-premýerleriniň, käbir ministrlikleriň we pudaklaýyn dolandyryş edaralarynyň ýolbaşçylarynyň gatnaşmagynda iş maslahatyny geçirdi.
Maslahatyň dowamynda "Berkarar döwletiň täze eýýamynyň Galkynyşy: Türkmenistany 2022-2052-nji ýyllarda durmuş-ykdysady taýdan ösdürmegiň Milli maksatnamasyny" hem-de Türkmenistanyň Prezidentiniň ýurdumyzy 2022-2028-nji ýyllarda durmuş-ykdysady taýdan ösdürmegiň Maksatnamasyny ýerine ýetirmegiň ugurlary we bu babatda öňde durýan wezipeler ara alnyp maslahatlaşyldy.
Iş maslahatynyň dowamynda oňa gatnaşanlar gözegçilik edýän düzümlerinde alnyp barylýan işleriň ýagdaýy we pudaklaryň öňünde durýan wezipeleri üstünlikli ýerine ýetirmek ugrunda amala aşyrylýan giň möçberli özgertmeler barada hasabat berdiler.
2022-2052-nji ýyllarda Türkmenistanyň durmuş-ykdysady syýasatynyň sazlaşykly ykdysady ösüşi üpjün etmäge, döwlet dolandyryş ulgamyny kämilleşdirmäge, halkymyzyň ýaşaýyş-durmuş şertlerini gowulandyrmaga gönükdirilendigini belläp, Gurbanguly Berdimuhamedow şu maksat bilen ykdysadyýetiň diwersifikasiýalaşdyrylmagyny dowam etmegiň, ýokary tehnologik önümçiligiň ykdysady ösüşine goşandyny artdyrmagyň, pudaklary sanlylaşdyrmagyň, makroykdysady we maliýe durnuklylygy saklamagyň wajypdygyna ünsi çekdi.
Milli ykdysadyýetiň mundan beýläk-de innowasion we senagat taýdan ösmeginde hususyýetçilige möhüm ornuň degişlidigini belläp, Gurbanguly Berdimuhamedow ýurduň jemi içerki önüminde döwlete dahylsyz bölegiň paýynyň artýandygyny belledi. Dünýä ykdysadyýetiniň çalt depginler bilen özgerýän şertlerinde pudaklaryň köpugurly esasda ösüşine zerur üns berilmelidir.
