Türkmenistanyň Russiýa Federasiýasyndaky ilçisi Batyr Nyýazlyýew Moskwada Russiýanyň daşary işler ministri Sergeý Lawrow bilen duşuşdy. Onuň barşynda türkmen tarapyna RF-niň Türkmenistanda täze bellenen ilçisi Iwan Wolynkin tanyşdyryldy.
Lawrow Iwan Wolynkiniň RF-niň Türkmenistandaky ilçisi hökmünde alyp barjak işiniň ýurtlaryň arasyndaky strategiki gatnaşyklaryň ösüşine täze oňyn itergi berjekdigine ynam bildirdi.
Nyýazlyýew kärdeşini wezipä bellenmegi bilen gutlap, diplomatik gullugyň täze ýerinde üstünlikleri arzuw etdi. Bu barada Russiýadaky türkmen diplomatik wekilhanasy habar berýär.
Öň habar berşimiz ýaly, Russiýanyň Prezidenti Wladimir Putin apreliň başynda Aleksandr Blohini wezipesinden boşadyp, Iwan Wolynkini Russiýanyň Türkmenistandaky ilçisi edip belledi.
Wolynkin 1959-njy ýylda Moskwada doguldy. 1981-nji ýylda SSSR-iň DIM-niň Moskwanyň döwlet halkara gatnaşyklary institutyny tamamlady (häzirki Russiýanyň DIM-niň MGIMO-sy) we RF-niň Ýugoslawiýadaky, ABŞ-daky, Gruziýadaky, Makedoniýadaky we Ermenistandaky ilçihanalarynda işledi.
