Tailand Patyşalygynyň Türkmenistanda täze bellenen Adatdan daşary we Doly ygtyýarly Ilçisi (oturýan ýeri Ankara ş.) Apirat Sugondhabhirom Türkmenistanyň daşary işler ministriniň orunbasary M.Bäşimowa ynanç hatlarynyň nusgalaryny gowşurdy. Bu barada türkmen daşary syýasat edarasynyň saýty habar berýär.
Söhbetdeşligiň dowamynda Türkmenistanyň daşary işler ministriniň orunbasary iki ýurduň daşary işler ministrlikleriniň arasynda ikitaraplaýyn hyzmatdaşlygyň geljegini ara alyp maslahatlaşmak üçin nobatdaky geňeşmeleri geçirmegi teklip etdi.
Taraplar şeýle hem Türkmenistanyň Tailand Patyşalygyndaky ilçisini bellemek mümkinçiligini ara alyp maslahatlaşdylar.
Türkmen tarapy Türkmenistan bilen Tailandyň arasynda halkara guramalarynyň çäklerinde hem oňyn hyzmatdaşlygyň bardygyny nygtady.
Köptaraplaýyn görnüşde özara gatnaşyklary alyp barmaklygyň çäklerinde diplomatlar "Merkezi Aziýa-ASEAN" formatyny döretmek pikirine-de üns berdiler.
Duşuşygyň barşynda diplomatlar söwda-ykdysady ulgamda hem Türkmenistan bilen Tailand Patyşalygyň arasyndaky hyzmatdaşlygy giňeltmegiň geljegi barada pikir alyşdylar. Bu ýerde energetika, gaz-himiýa we oba hojalygy pudaklary ileri tutulýan ugurlar hökmünde kesgitlenildi.
Ylym, medeni-ynsanperwer ugurlarda, şeýle hem syýahatçylyk we sport pudaklarynda ikitaraplaýyn hyzmatdaşlyk üçin uly mümkinçilikleriň bardygy bellendi.
Tailandyň ilçisiniň iş saparynyň dowamynda Türkmenistanyň Mejlisinde ynanç hatlarynyň gowşurylmagy, şeýle hem ýurdumyzyň ministrliklerinde we pudak edaralarynda birnäçe duşuşyklary geçirmek meýilleşdirilýär.
Türkmenistan bilen Tailand Patyşalygynyň arasyndaky diplomatik gatnaşyklar 1992-nji ýylyň 6-njy iýulynda ýola goýuldy.
