BMG-niň Baş sekretary Antonio Guterreş adam hukuklary, hususan-da, aýal-gyzlaryň hukuklary, inklýuziw dolandyryş, terrorçylyga we neşe serişdeleriniň bikanun dolanyşygyna garşy göreş ýaly möhüm meselelerde umumy pikire gelmek üçin Kataryň Doha şäherinde sammit geçirdi we oňa Owganystan boýunça ýörite wekilleri ýygnady. Duşuşyk bu meseleler boýunça taliban häkimiýeti bilen neneňsi işleşmelidigi barada halkara jemgyýetçiliginde umumy düşünişmäge gönükdirildi diýip, Orient ýazýar.
Duşuşyga Türkmenistanyň, Hytaýyň, Fransiýanyň, Germaniýanyň, Hindistanyň, Indoneziýanyň, Eýranyň, Ýaponiýanyň, Gazagystanyň, Gyrgyzystanyň, Norwegiýanyň, Pakistanyň, Kataryň, Russiýa Federasiýasynyň, Saud Arabystanynyň, Täjigistanyň, Türkiýäniň, Özbegistanyň, Birleşen Arap Emirlikleriniň, Angliýanyň, ABŞ-nyň, Ýewropa Bileleşiginiň we Yslam Hyzmatdaşlygy Guramasynyň wekilleri gatnaşdylar.
Iki gün dowam eden sammit sişenbe güni tamamlandy. Antonio Guterreş ýapyk ýygnagyň esasy netijeleri bilen metbugat wekilleriniň öňünde çykyş etdi.
«Esasy zat, ählimiziň birek-biregiň aladalaryna we çäklendirmelerine düşünmegimiz, ýöne bilelikde işlemegiň hemmeleriň, esasanam, owganlylaryň bähbidine boljakdygy üçin ylalaşmagymyzdyr» diýip, BMG-niň Baş sekretary belledi.
