Eýranyň Ulag ösüş gaznasynyň ýerine ýetiriji direktory Russiýanyň we Hindistanyň maliýe çeşmelerini ýurtda ulag infrastrukturasynyň taslamalaryny durmuşa geçirmek üçin ulanmak mümkinçiliginiň bardygyny mälim etdi.
Ol Merkezi Aziýa döwletleriniň demir ýol ulaglary babatdaky berk garaýyşlaryny göz öňünde tutup, Demirgazyk-Günorta ulag geçelgesinde demirýollaryň kuwwatyny ulanmak üçin has köp mümkinçiligiň we gündogar Eýranda bu ugurda infrastrukturany güýçlendirmek hem-de ösdürmek üçin möhüm taslamalaryň bardygyny aýtdy diýip, Orient habar berýär.
Şeýlelik bilen, Tasnim news-iň habar bermegine görä, sebit ulag ulgamynyň zerurlyklarynyň köpüsini Bender-Abbas portundan Inçeburun geçelgesiniň we Sarahsyň üsti bilen Türkmenistana çenli demir ýoluň kuwwatyny ýokarlandyrmak arkaly kanagatlandyryp bolar.
Daneş Jafari «Demirgazyk-Günorta» geçelgesiniň ähli mümkinçiliklerinden peýdalanmak üçin Hazar döwletleriniň portlary bilen has köp aragatnaşyk saklamagyň hasabyna Hazardaky ulag ulgamyny güýçlendirmelidigini aýtdy.
Ulag taslamalaryna goýulýan maliýe serişdelerini köpeltmek üçin ýakynda Eýranyň Ulag ösüş gaznasy döredildi.
