Ýaponiýanyň Dolandyryş işleri we kommunikasiýalar ministri Takeaki Masumoto penşenbe güni Tokioda geçirilen ýygnakda öz edarasynyň içinde ChatGPT emeli aň esasly çat-boty ulanmaga synanyşjakdygyny aýtdy diýip, TASS habar berýär.
"ChatGPT-iň işi wagtynda takyk däl jogaplaryň bolmagynyň we şahsy maglumatlaryň syzmagynyň mümkindigini bilýäris, ýöne şeýle ýagdaýlar ony ulanmakdan ýüz öwürmek üçin ýeterlik esas bolup bilmez. Şunuň bilen baglylykda, ministrligiň gündelik işlerinde çat-bot-dan peýdalanyp görmek isleýäris"- diýip, NHK teleýaýlymy Masumotonyň sözlerini getirýär.
Mundan başga-da, Kyodo agentliginiň maglumatlaryna görä, çat-botuň synag tertibinde ulanylmagy eýýäm Tokionyň goňşy Kanagawa prefekturasynda ýerleşýän Ýokosuka şäheriniň ýolbaşçylygy tarapyndan girizildi. Hususan-da, ChatGPT bir aýlap metbugat beýanlaryny taýýarlamaga gatnaşar. Üstünlikli netijeler gazanylan halatynda şäher häkimligi ony ulanmagyny dowam etdirmegi göz öňünde tutýar diýip, agentlik belleýär.
