Ýaponiýada raýatlaryň sany eýýäm 12-nji ýyl azalýar, 2022-nji ýylda ol 122 mln 31 müň adama barabar boldy diýip, hökümetiň maglumatlaryna salgylanyp, The Japan Times habar berýär. Muny interfax.ru ýetirýär.
2021-nji ýyl bilen deňeşdirilende ýurduň raýatlarynyň sany 750 müň adam azaldy, bu 1950-nji ýylda şeýle maglumatlar neşir edilip başlanandan bäri bir ýylyň dowamynda ilat sanynyň azalyşynyň iň ýokary görkezijisidir. Ýaşaýjylaryň sanynyň azalmagy Ýaponiýanyň Tokiodan başga ähli prefekturalarynda hasaba alyndy.
Şol bir wagtyň özünde 15 – 64 ýaş aralygyndaky zähmete ukyply ilat 296 müň adam – 74 mln 208 müň adama çenli azaldy we indi ol umumy ilatyň 59,4%-ini emele getirýär. 14 ýaşly we ondan kiçi ýaşdaky ýaşaýjylaryň sany ilatyň 11,6%-ine çenli azaldy, 65 ýaşly we ondan uly ýaşly adamlaryň sany bolsa 29%-e çenli ýokarlandy.
Ýaponiýada çaga dogluş derejesi 1973-nji ýyldan bäri peselmegini dowam etdirýär, şol wagt görkeziji ýylda 2,09 mln çagady. 2016-njy ýylda bir ýylda dünýä inen çagalaryň sany 1 milliondan aşak düşdi. 2022-nji ýylda Ýaponiýada 1899-njy ýyldan bäri ilkinji gezek 800 müňden az çaga dünýä indi.
