ABŞ-nyň Demokratik partiýasynyň prezidentlige resmi taýdan dalaşgär hödürlejek konferensiýasy 2024-nji ýylyň 19-22-nji awgustynda Çikagoda geçiriler. TASS agentliginiň habaryna görä, bu barada sişenbe güni Chicago Sun-Times gazeti ýazdy.
Neşir Ak tamyň bu meýilnamalar barada şäher häkimligine eýýäm habar berendigini belleýär.
Respublikan we Demokratik partiýalar, adatça, saýlawdan öň tomusda prezidentlige dalaşgär yglan ediljek konferensiýalaryny geçirýärler. Düzgün bolşy ýaly, dalaşgär deslapky saýlawlaryň netijeleri bilen kesgitlenýär, ýöne güýçli dalaşgärleriň birnäçe deslapky saýlawlarda takmynan birmeňzeş ses alanam bolsa, konferensiýa gatnaşyjylaryň sesi aýgytly rol oýnap biler.
Ondan öň, ABŞ-nyň prezidenti Jo Baýden 2024-nji ýylda geçiriljek saýlawlara gatnaşmak isleýändigini birnäçe gezek mälim edipdi, emma şu wagta çenli dalaşgärliginiň resmi hödürlenmegini yza süýşürdi.
