Bütindünýä Ýeňil atletika assosiasiýasy ilkinji gezek 2024-nji ýylda Pariždäki Olimpiýa oýunlarynda geçiriljek sport ýörişi boýunça täze garyşyk ýaryş bilen tanyşdyrdy. Bu barada russian.news.cn habar berýär. Marafon aralygynda sport ýörişi boýunça täze garyşyk estafeta erkekleriň 50 km aralyga marafonynyň ornuny tutar. Oňa 25 topar gatnaşar. Toparlaryň her biri bir erkek we bir zenan türgenden ybarat bolup, olar “takmynan deň uzynlykdaky” dört bölegi gezekleşip geçip, 42,195 km aralygy geçmeli bolarlar.
World Athletics-iň belleýşi ýaly, marafon aralygynyň saýlanmagy “onuň ýeňil atletikanyň meşhur görnüşidigi we Olimpiýa oýunlarynyň taryhy däpleri bilen baglanyşyklydygy” bilen düşündirilýär.
Estafeta erkekleriň we zenanlaryň 20 km aralyga sport ýörişi boýunça ýaryşlary bilen bir ýolda geçiriler. Hasaba görä, aralyk, takmynan, üç sagatda geçiler.
“Täze ýaryşyň formaty onuň innowasion, dinamiki we üýtgeşik häsiýetli boljak görnüşinde oýlanyp tapyldy. Biz ýaryş janköýerlere düşnükli bolup, gyzykly göreş bilen tapawutlanar we, iň möhüm ýeri, ýeňil atletika boýunça Olimpiýa ýaryşlarynda ilkinji gezek doly derejeli gender deňligini üpjün eder diýip hasaplaýarys” – diýip, guramanyň baş ýerine ýetiriji müdiri Jon Rijon belledi.
Assosiasiýa täze dissiplina boýunça toparlaýyn saýlama ýaryşlarynyň nähili geçiriljekdigi barada maglumatlary heniz hödürlemedi.
