2023-nji ýylyň 7-nji aprelinde Bütindünýä saglyk güni mynasybetli Aşgabatda giňden ýaýbaňlandyrylan sport çäreleri bilen birlikde köpçülikleýin welosiped ýörişi geçiriler. Türkmenistanyň Içeri işler ministrliginiň Polisiýanyň ýol gözegçiligi gullugy weloýörişiň geçjek ýollarynda günüň birinji ýarymynda ulaglaryň hereketiniň çäklendiriljekdigini habar berdi diýip, Turkmenportal ýetirýär.
Köpçülikleýin welosipedli ýöriş Aşgabadyň Bekrewe we Çandybil köçesiniň aýlawçasyndaky Welosiped binasyndan gündogarlygyna badalga alyp, Çandybil we Bitarap Türkmenistan şaýolunyň kesişmesindäki aýlawçadan demirgazyklygyna, Bitarap Türkmenistan şaýolunyň ugry bilen Galkynyş köçesine çenli aralykda bolar.
Hereket howpsuzlygyny üpjün etmek maksady bilen Aşgabat şäheriniň ýaşaýjylaryna we myhmanlaryna hereketi Arçabil, Garaşsyzlyk, Türkmenbaşy şaýollarynyň üsti bilen dowam etmeklik maslahat berilýär.
Şeýle hem Polisiýanyň ýol gözegçiligi gullugy sürüjilere awtoulaglaryny ýol ýakalarda goýmaklygyň her bir herekete gatnaşyja düýpli päsgelçilik döredýändigini ýatladyp, hereket etjek ugruny öňünden kesgitlemegi habar berýär.
