5-nji aprelde türkmen halkynyň Milli Lideri Gurbanguly Berdimuhamedow Söwda-senagat edarasynda guralan Türkmenistanyň söwda toplumynyň sergisine baryp gördi we bu ýerde Türkiýe Respublikasynyň Palatalar we biržalar birleşiginiň başlygy bilen duşuşyk geçirdi.
Duşuşygyň dowamynda ikitaraplaýyn gatnaşyklaryň wajyp meseleleri we ozal gazanylan ylalaşyklary ýerine ýetirmegiň ugurlary ara alnyp maslahatlaşyldy.
Türkiýäniň Palatalar we biržalar birleşiginiň başlygy Türkmenistanda ýaýbaňlandyrylan dürli maksatly taslamalaryň durmuşa geçirilmegine türkiýeli işewürleriň çagyrylmagynyň özleri üçin uly hormatdygyny belledi.
Duşuşyk tamamlanandan soňra, Gurbanguly Berdimuhamedow myhman bilen bilelikde Arkadag şäheriniň ýerleşýän ýerine tarap ugrady.
Türkmen halkynyň Milli Lideri myhmana häzirki zamanyň ösen tejribesiniň we milli binagärlik ýörelgeleriniň utgaşdyrylmagynda bina edilen Arkadag şäheri, onuň döreýiş taryhy, şäherde bar bolan desgalar hem-de olaryň binagärlik aýratynlyklary barada gürrüň berdi.
Türkmen halkynyň Milli Lideri täze şäheriň çäklerinde eýýäm Gurbanguly Berdimuhamedow adyndaky çagalar sagaldyş-dikeldiş merkeziniň gurlandygyny aýdyp, türkiýeli işewür toparlary bu merkeziň ýanynda çagalar üçin niýetlenen dürli önümleriň, derman serişdeleriniň önümçiligi boýunça toplumyň gurluşygyna gatnaşmaga çagyrdy.
Soňra Gurbanguly Berdimuhamedow Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň ýolbaşçysy D.Orazowa Türkiýe Respublikasynyň Palatalar we biržalar birleşiginiň başlygyny Arkadag şäheriniň binagärlik aýratynlyklary bilen tanyşdyrmagy tabşyrdy.
