Türkiýäniň prezidenti Rejep Taýyp Ärdogan Türkiýede öndürilen Togg elektrik krossoweriniň ilkinji eýesi boldy. Ol özüne gök reňkli awtoulagy saýlady diýip, RIA Nowosti ýazýar.
Döwlet baştutanynyň gatnaşmagynda geçen tanyşdyrylyş dabarasynda gyzyl we gök reňkli iki sany elektrik awtoulagy görkezildi. Ärdogan aýaly Emine bilen bilelikde çärä gatnaşdy. Indiki Togg elektrik awtoulagyny Azerbaýjanyň prezidenti Ilham Alyýew alar.
Awtoulagyň önümçiliginiň geçen ýyl başlandygyna garamazdan, onuň haryt ady henizem belli däl. Resmi web sahypasynda oňa Togg-C SUV diýilýär. 2024-nji ýylda markanyň ikinji awtoulagy Togg-C Sedan bolmaly.
Ilkinji seriýaly türk elektrik awtoulagynyň bahasy 1 milliondan 1,6 million lira çenli. Ilkinji müşderiler sargyt edilen awtoulaglary şu aýdan alyp başlarlar. Türkiýede elektrik ulaglaryna bolan islegi höweslendirmek üçin 2000 töweregi zarýad beriş stansiýasy oturdyldy.
Togg-C SUV ulagynyň esasy toplumy 204 at güýji bolan bir sany elektrik hereketlendirijisi bilen standart gelýär. Bir zarýadda ýöreýiş ätiýaçlygy 314 kilometre barabardyr. Has ösen görnüşi 408 at güýji we 500 kilometrden gowrak özbaşdaklygy bolan goşa hereketlendirijili bolar.
