1-nji aprelde türkmen halkynyň Milli Lideri, Türkmenistanyň Halk Maslahatynyň Başlygy Arkadag şäherine iş saparyny amala aşyrdy. Bu ýerde türkmen halkynyň Milli Lideri Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň guramaçylyk meselelerine bagyşlanan ilkinji iş maslahatyny geçirdi.
Bellenilişi ýaly, bu gazna Türkmenistanyň kanunçylygyna, halkara kada-kanunlaryna, şeýle hem oňyn halkara tejribelerine laýyklykda döredilen we degişli hukuk derejesine eýe bolan dünýäde ilkinji gazna bolup durýar.
Maslahatyň barşynda Türkmen halkynyň Milli Lideri Gaznanyň ýolbaşçy düzümleriniň sanawy barada belledi. Bellenilişi ýaly, Haýyr-sahawat gaznasynyň düzümi onuň prezidentinden hem-de orunbasaryndan, iş dolandyryjysynyň wezipesinden, gaznanyň başlygynyň kömekçisinden, gaznanyň media habarlar wekilinden ybarat bolar. Şeýle hem gaznanyň düzüminde hukukçynyň hem-de hasapçynyň iş orunlary dörediler. Bu ýolbaşçylar işlerini jemgyýetçilik başlangyçlary esasynda alyp bararlar.
