27-nji martda Prezident Serdar Berdimuhamedow «Rossiýskiýe železnyýe dorogi» AGPJ-niň baş direktory – müdiriýetiniň başlygy Oleg Belozýorowy kabul etdi.
Serdar Berdimuhamedow ulag-logistika pudagynda hyzmatdaşlygy işjeňleşdirmegiň möhümdigine ünsi çekip, biziň ýurdumyzyň çäklerinden geçýän “Demirgazyk-Günorta” ulag – logistika geçelgesiniň demir ýolunyň mümkinçilikleriniň Russiýadan Eýrana hem-de soňra Aziýa – Ýuwaş ummany sebitiniň döwletlerine we ýene-de şol ugur boýunça garşy tarapa yzygiderli konteýner gatnawlaryny ýola goýmak arkaly doly herekete girizmegiň Türkmenistanyň we Russiýa Federasiýasynyň bähbitlerine laýyk geljekdigini belledi.
Serdar Berdimuhamedowyň nygtaýşy ýaly, Russiýanyň kompaniýalarynyň Türkmenistanda demir ýollary hem-de ugurdaş düzümleri döwrebaplaşdyrmak we elektrofikasiýalaşdyrmak, önümçilik amallaryny sanlylaşdyrmak, hünärmenleri taýýarlamak ulgamynda hyzmatdaşlygy ýola goýmak boýunça taslamalara gatnaşmagynyň geljegi uludyr. Şunuň bilen baglylykda, türkmen tarapynyň bu babatda russiýaly hyzmatdaşlaryň anyk tekliplerine garamaga taýýardygy beýan edildi.
Söhbetdeşligiň dowamynda taraplar üçin ykdysady taýdan bähbitlilik esasynda uzakmöhletleýin hyzmatdaşlygyň mümkinçilikleri giňişleýin ara alnyp maslahatlaşyldy.
