19-20-nji martda Türkmenistanyň Prezidenti Serdar Berdimuhamedow Katar Döwletine resmi saparyny amala aşyrar. Häzirki wagtda resmi sapara taýýarlyk görmek boýunça toplumlaýyn işler amala aşyrylýar.
17-nji martda geçirilen Hökümet mejlisiniň barşynda wise-premýer, daşary işler ministri R.Meredow döwlet Baştutanynyň garamagyna degişli maksatnamany hödürledi.
Mälim bolşy ýaly, iki ýurduň arasyndaky diplomatik gatnaşyklar 1996-njy ýylyň noýabr aýynda ýola goýuldy.
Häzirki wagtda, türkmen-katar gatnaşyklarynyň şertnama-hukuk binýady 25 resminamadan ybarat bolup durýar. Söwda-ykdysady hyzmatdaşlygy pugtalandyrmakda we giňeltmekde bilelikdäki Hökümetara toparynyň işi uly ähmiýete eýedir. Onuň nobatdaky mejlisini şu ýylyň dowamynda Aşgabatda geçirmek göz öňünde tutulýar.
Belläp geçsek, 2022-nji ýylyň 3-nji dekabrynda Katar Döwletiniň Emiri Şeýh Tamim bin Hamad Al Taniniň çagyrmagy boýunça Prezident Serdar Berdimuhamedow Katara sapar bilen bardy we Dohada geçirilýän futbol boýunça dünýä çempionatynyň oýunlarynyň biriniň hormatly myhmany boldy.
