Aşgabatda Gurtly ýaşaýyş toplumynda dört gatly 46 sany täze ýaşaýyş jaýlaryny gurmak meýilleşdirilýär. 46 sany ýaşaýyş jaýyň 16-sy 68 öýli, 30-sy 40 öýli jaýlardan ybarat bolar. Şeýlelikde Gurtly ýaşaýyş toplumynda 2200-den gowrak täze öý peýda bolar.
Şunuň bilen baglylykda, Türkmenistanyň Gurluşyk we binagärlik ministrligi Aşgabat şäher häkimliginiň we Türkmenistanyň Senagatçylar we telekeçiler birleşmesiniň buýurmagynda degişli bäsleşigi yglan etdi. Bu bäsleşik “Türkmenistan” gazetinde duşenbe güni çap edildi.
Ýaşaýyş toplumynda şeýle hem 720 orunlyk orta mekdep, 320 orunlyk çagalar bagy, seýilgäh, söwda-dynç alyş merkezi we ýedi sany iki gatly söwda we hyzmat öýleri gurlar.
Bäsleşik ýaşaýyş toplumynyň içerki awtomobil ýollaryny, daşarky eltiji we içerki agyz suw hem-de lagym geçiriji ulgamlary öz içine alýar.
Gyzyklanma bildirýän taraplaryň haýyşnamalary, teklipleri ministrligiň Bazary öwreniş we daşary ykdysady gatnaşyklar müdirliginde bellenilen tertipde kabul edilýär hem-de resmileşdirilýär.
Haýyşnamalar 2023-nji ýylyň 25-nji apreline çenli kabul edilýär. Salgysy: Aşgabat şäheriniň Arçabil şaýolunyň 84-nji jaýy.
Habarlaşmak üçin telefon belgileri: 44-46-64, 44-46-77
