11-nji martda Gurbanguly Berdimuhamedow Arkadag şäherine nobatdaky iş saparynyň barşynda bu ýerde alnyp barylýan işleriň ýagdaýy, hususan-da, täze binalaryň açylyş dabarasyna, köpçülikleýin bag nahallaryny ekmegiň ýazky möwsümine görülýän taýýarlyk işleri bilen tanyşdy.
Türkmen halkynyň Milli Lideri Arkadag şäheriniň Saglygy goraýyş müdirliginiň başlygyna ýüzlenip, bu ýerde hereket edýän saglygy goraýyş ulgamyna degişli düzümleriň işini talabalaýyk guramak bilen baglanyşykly meselelere örän jogapkärçilikli çemeleşmegi tabşyrdy.
Şeýle hem türkmen halkynyň Milli Lideri Arkadag şäher Alyjylar jemgyýetiniň ýolbaşçysynyň öňünde durýan wezipelere ünsi çekip, bu ýerde söwda hem-de hyzmatlar ulgamyna degişli düzümleriň sazlaşykly işini üpjün etmek babatda birnäçe görkezmeleri berdi.
Söwda dükanlarynda we beýleki düzümlerde söwdany ýola goýmagyň täzeçil usullary ýerine ýetirilmelidir. Şunda sanly ulgamyň mümkinçiliklerinden netijeli peýdalanylmalydyr. Şol bir wagtyň özünde sargyt edijileriň harytlaryny we önümlerini eltip bermek üçin niýetlenen ulaglaryň bezeg aýratynlyklarynyň hem ünsden düşürilmeli däldigini belläp, Gurbanguly Berdimuhamedow bu babatda degişli ýolbaşçylara anyk görkezmeleri berdi.
Gurbanguly Berdimuhamedow Aba Annaýew adyndaky Halkara atçylyk ýokary okuw mekdebiniň rektory P.Baýramdurdyýewe ýüzlenip, täze ýokary okuw mekdebiniň ähli düzümleriniň dolandyryş ulgamynyň guramaçylyk meselelerine hemmetaraplaýyn esasda girişmegi tabşyrdy. Şunda ýokary okuw mekdebiniň ýolbaşçy düzümleri hünär taýdan taýýarlaýyş okuwlaryny geçmelidirler.
Halk Maslahatynyň başlygy Arkadag şäheriniň harby we hukuk goraýjy edaralarynyň ýolbaşçylaryna degişli gulluklaryň edara-binalarynyň döwrebap derejede enjamlaşdyrylmagyna, olarda işgärler üçin bolşy ýaly, ilatymyz üçin zerur bolan maglumatlaryň ýerleşdirilmegine, iň esasy bolsa, sanly ulgamyň, täzeçil tehnologiýalaryň ornaşdyrylmagyna aýratyn üns bermegi tabşyrdy.
