Apple ýakyn alty ýylda Mýunheniň çipleri işläp taýýarlaýan merkezine (Silicon Design Centre) 1 milliard ýewro maýa goýar. Bu baradaky habar korporasiýanyň resmi blogunda peýda boldy.
Apple Mýunheniň kompaniýanyň Ýewropadaky iň uly inženerçilik merkezidigini nygtaýar. Nemes hünärmenleri ençeme ýyl bäri Apple-iň dünýädäki müşderilerini begendirip gelýän täzelikçileriň bir bölegidir.
“Mýunhendäki inženerlerimiz ösüşiň öň hatarlarynda durýarlar we önümlerimizde ulanýan täze tehnologiýalarymyzy ösdürmäge kömek edýärler. Apple Mýunhende 40 ýyldan gowrak wagt bäri işleýär, ýöne geljekde bu ýerde boljak gowulyklar üçin şeýle çyndan tolgunan wagtymyz bolmandy " – diýip, Apple-iň baş direktory Tim Kuk mälim etdi.
Kompaniýa bölünip berlen serişdeleriň Zaýdel Ştrassdaky "ultrahäzirkizaman gözleg merkezini" ösdürmek we gurmak üçin sarp ediljekdigini aýtdy. Onda hususan-da, laboratoriýa meýdançasy we häzirki zaman dizaýn merkezi ýerleşer.
Geçmişde Mýunheniň gözlegçileriniň Apple tehnologiýasynyň ösmegine eýýäm uly goşant goşandyklary bellenildi. Mysal üçin, nemes inženerleri M2 seriýaly prosessorlary, käbir güýç dolandyryjylaryny we öýjükli aragatnaşyk ulgamlaryny döretdiler.
