Germaniýanyň BMW konserni içerki ýangyç hereketlendirijisi bolan awtoulaglardan kem-kemden ýüz öwürmegiň çäklerinde hiç hili zyňyndysy bolmadyk wodorod ýangyjynyň elementleri bilen işleýän awtoulaglara bil baglar. Şu onýyllygyň ahyryna çenli “ýaşyl” awtoulaglaryň yzygiderli önümçiligini ýola goýmak meýilleşdirilýär.
Bu sözleri BMW tehnologiýasynyň bölüm başlygy Ýurgen Guldner aýtdy diýip, The Times ýazýar. "Wodorodyň geljegine ynanýaryn" - diýip, Guldner wodorod bilen işleýän BMW iX5 Hydrogen wnedorožniginiň köpçülikleýin öndürilmeginiň geljegi barada aýdanda ýatlady.
X5 esasly wodorod krossoweri bolan iX5 Hydrogen-niň prototipi nemes kompaniýasy tarapyndan 2020-nji ýylda hödürlenipdi. Enjam pol tunelinde oturdylan iki ballon bilen enjamlaşdyrylandyr. Baklary 700 bar basyşda alty kilogram wodorod bilen dolduryp bolýar. Şol bir wagtyň özünde, iX5 Hydrogen-niň daşky görnüşi we salony içki ýangyç hereketlendirijili X5-den tapawudy ýok diýen ýaly.
Wodorod ýangyjynyň elektrik batareýalaryndan esasy artykmaçlygy — ýangyjy tiz guýup bolýar. Owal BMW-niň satuw bölüminiň başlygy Piter Nota wodorod awtoulagyna üç-dört minutda ýangyç guýup boljakdygyny aýtdy.
Häzirki wagtda Ýewropada diňe iki sany wodorod ýangyç elementlerinde işleýän awtoulag modeli bar: Toyota Mirai we Hyundai Nexo. Neşir BMW-iň sebitdäki ilkinji wodorod awtoulag öndürijisi bolup biljekdigini belleýär.
