Türkmenistan boýunça Mejlisiň deputatlygyna, welaýat, etrap we şäher halk maslahatlarynyň we Geňeşleriň agzalygyna 14872 sany dalaşgär hödürlendi we bellige alyndy. 28-nji fewralda dalaşgärleri bellige almak tamamlandy.
26-njy martda geçiriljek saýlawlarda milli parlamentiň deputatlygyna 258 dalaşgär, welaýatlaryň we Aşgabat şäheriniň halk maslahatlarynyň agzalygyna 515 dalaşgär, etraplaryň we şäherleriň halk maslahatlarynyň agzalygyna 2001 dalaşgär, Geňeşleriň agzalygyna 12098 dalaşgär bar.
25-nji marta çenli saýlawlaryň öňüsyrasyndaky wagyz-nesihat çärelerini we saýlaw möwsümini köpçülikleýin habar beriş serişdelerinde beýan etmek işleri dowam eder.
Ähli okruglarda bir orna 2-3 dalaşgär hödürlendi. Saýlawlara Demokratik partiýadan 6241, Senagatçylar we telekeçiler partiýasyndan 523, Agrar partiýasyndan 3576, raýatlar toparyndan 4532 dalaşgär görkezildi.
Ýakyn wagtda ýurdumyzyň kanun çykaryjy häkimiýet, şeýle hem ýerli öz-özüňi dolandyryş we wekilçilikli häkimiýet edaralarynda dalaşgärleriň saýlawçylary bilen duşuşyklary başlanar.
Tutuş ýurdumyz boýunça Türkmenistanyň Mejlisiniň deputatlarynyň 125-sini saýlamaly. Welaýat halk maslahatynyň agzalarynyň saýlawlary saýlaw okruglarynyň 240-synda, etraplaryň we şäherleriň halk maslahatynyň agzalarynyň saýlawlary okruglaryň 960-synda, Geňeşleriň agzalarynyň saýlawlary bolsa okruglaryň 5897-sinde geçiriler. Ses bermek üçin saýlaw uçastoklarynyň 2644-si döredildi.
