Şu gün, 18-nji fewralda Magtymguly adyndaky Türkmen döwlet uniwersitetinde «Medeni miras: geçmişden geljege» ÝUNESKO kafedrasynyň açylyş dabarasy geçirildi. Bu barada uniwersitetiň resmi saýty habar berýär.
ÝUNESKO kafedrasynyň açylyş dabarasyna BMG-niň Bilim, ylym we medeniýet meseleleri boýunça guramasynyň (ÝUNESKO) işleri barada Türkmenistanyň Milli toparynyň jogapkär sekretary Çynar Rüstemowa, şeýle-de Türkmenistanyň Bilim ministrliginiň, Türkmenistanyň Medeniýet ministrliginiň hem-de ugurdaş pudaklaryň wekilleri gatnaşdylar.
Täze kafedrany döretmek bilen baglanyşykly, uniwersitetiň M.Lomonosow adyndaky Moskwa döwlet uniwersiteti, Ýerewan döwlet uniwersiteti, Baku döwlet uniwersiteti, L.N.Gumilýow adyndaky milli Ýewraziýa uniwersiteti bilen hyzmatdaşlyk gatnaşyklary netijesinde, bu iri bilim ojaklaryndan goldaw hatlary alyndy. Şeýle hatlar Türkmenistanyň Medeniýet ministrliginden, Medeniýet ministrliginiň Türkmenistanyň taryhy we medeni ýadygärlikleri goramak, öwrenmek hem-de rejelemek baradaky milli müdirliginden, Türkmenistanyň Döwlet medeniýet merkeziniň Döwlet muzeýinden we Türkmenistanyň Ylymlar Akademiýasynyň Taryh we arheologiýa institutyndan alyndy.
Magtymguly adyndaky Türkmen döwlet uniwersiteti bilen Birleşen Milletler Guramasynyň Bilim, Ylym we Medeniýet meseleleri boýunça Guramasynyň arasynda Ylalaşyk baglaşyldy.
Ýokary okuw mekdebinde bu kafedranyň döredilmeginiň maksady umumadamzat tarapyndan döredilen medeni mirasy, däp-dessurlary içgin öwrenmek, taryhy we medeni mirasy gorap saklamak, wagyz-nesihat etmek, kanuny-hukuk esaslaryny hem-de gerek bolan usuly serişdelerini kämilleşdirmek arkaly, ýaş ylmy-gözlegçileriň mümkinçiliklerini, olaryň ylmy-gözleg işlerini giňeltmek bilen ÝUNESKO, onuň kafedralary we UNITWIN torlary bilen degişli maksatnamalar we çäreler boýunça ýakyn hyzmatdaşlygy saklamakdan ybaratdyr.
