Türkmenistanda birbada iki sany ýokary okuw mekdebinde ÝUNESKO-nyň kafedralary açylar. Bu barada degişli resminamalara Türkmenistanyň Daşary işler ministrliginde gol çekildi.
Türkmenistanyň daşary syýasat edarasynyň binasynda geçirilen çärä Daşary işler ministrliginiň, Türkmenistanyň Bilim ministrliginiň ýolbaşçylary we işgärleri, Magtymguly adyndaky TDU-nyň hem-de Seýitnazar Seýdi adyndaky TDMI-niň rektorlary, ÝUNESKO-nyň we ÝUNESKO-nyň işi boýunça Türkmenistanyň Milli toparynyň ýolbaşçy wekilleri gatnaşdy.
Gol çekişlik dabarasyny Türkmenistanyň Fransiýadaky Adatdan daşary we Doly ygtyýarly ilçisi, Türkmenistanyň ÝUNESKO-daky hemişelik wekili M.Çaryýew açdy. Şeýle hem, çäräniň dowamynda Türkmenistanyň Bilim ministri G.Ataýewa, ÝUNESKO-nyň baş direktorynyň orunbasary hanym Stefania Jannini we ÝUNESKO-nyň işi boýunça Türkmenistanyň Milli toparynyň Jogapkär sekretary Ç.Rüstemowa çykyş etdi. Çykyş edenler Türkmenistanda ÝUNESKO-nyň ilkinji kafedralarynyň açylmagynyň ähmiýetini nygtap geçdiler.
Soňra Magtymguly adyndaky TDU-niň rektory B.Orazdurdyýewa Magtymguly adyndaky Türkmen döwlet uniwersitetinde ÝUNESKO-nyň "Medeni miras: geçmişden geljege" kafedrasyny döretmek baradaky ylalaşyga gol çekdi. Seýitnazar Seýdi adyndaky Türkmen döwlet mugallymçylyk institutynyň rektory G.Muhammedow ÝUNESKO-nyň "Durnukly ösüşiň bähbidine ekologiýa bilimi" kafedrasyny döretmek baradaky ylalaşyga gol çekdi.
117 döwletiň ýokary okuw jaýlarynyň şuňa meňzeş kafedralaryny birleşdirýän ÝUNESKO UNITWIN kafedralarynyň tory, olara ylym we bilim pudagynda köptaraplaýyn hyzmatdaşlygy ösdürmäge we halkara möçberinde milli tejribesini paýlaşmaga mümkinçilik berýär.
