BAE-niň premýer-ministri we Dubaýyň emiri Mohammed bin Raşid Al Maktum uçýan taksileri işläp düzmek maksatnamasynyň täzeden dikeldilýändigini mälim etdi diýip, incrussia.ru habar berýär.
Emirligiň hökümeti taksileri 2026-njy ýyla çenli işe girizmegi wada berdi. Geljekde taslamanyň awtorlary taksileriň doly derejede sürüjisiz bolup biljekdigini belleýärler.
Uçýan EV-taksiniň prototipi 2022-nji ýylda Günorta Koreýada uçýan taksileriň işe girizilýändigini anons eden Joby Aviation amerikan kompaniýasy tarapyndan hödürlener. Prototip akkumulýatoryň bir zarýady bilen sagatda 320 km tizlikde 240 km-den gowrak ýoly uçup geçip bilýär. Emirligiň Ýol we transport edarasy resmi şertnama heniz gol çekilmändigini belleýär.
Joby Aviation tarapyndan işlenip düzülen taksi 13-nji fewralda Dubaýda geçirilen Bütindünýä hökümet sammitinde görkezildi. Dubaýyň emiri Twitter akkauntynda elektromobiliň mahabatyny ýerleşdirdi.
Dubaý dört sany vertiports nokadyny ýa-da aerowokzaly döretmegi meýilleşdirýär: howa menzilinde, şäher merkezinde, emeli Palma adasynda we Marina sebitinde. Her bir vertiport iki gonuş meýdançasyna we EV-taksi üçin zarýad beriji stansiýa eýe bolar.
Bahalar adaty taksilerden has gymmat bolmaly däl. Dubaýda taksi bilen gatnawyň iň pes bahasy, takmynan, 3,25 dollar, ýoluň her kilometri üçin bolsa 0,5 dollar alynýar. Deslapky hasaba görä, uçýan taksiler üçin bahalar adaty bilen deňeşdirilende 30% gymmat bolar.
