7-nji fewralda Mary welaýatyna iş saparynyň dowamynda Prezident Serdar Berdimuhamedow welaýatyň ekerançylyk meýdanlarynda alnyp barylýan möwsümleýin oba hojalyk işleriniň barşyny synlady.
Şeýle hem döwlet Baştutany welaýatyň çäginden akyp geçýän Garagum derýasynyň kenarlaryny berkitmek boýunça alnyp barylýan işler bilen tanyşdy. Bu ýerde sowuk howa akymynyň aralaşmagy bilen baglylykda, derýada kadaly suw akymyny almak boýunça degişli işler alnyp barylýar. Bu işde kuwwatly tehnikalar netijeli işledilýär. Bu ugurda görülýän toplumlaýyn çäreler we amala aşyrylýan işler ýurdumyzyň obasenagatynyň sazlaşykly ösüşini, şunuň bilen baglylykda, pagtadan, bugdaýdan we beýleki oba hojalyk ekinlerinden ýokary hasylyň alynmagyny şertlendirýär.
Ekin meýdanlaryny suw bilen bökdençsiz üpjün etmekde Garagum derýasynyň ähmiýeti örän uludyr. Şunda welaýatyň çäginden akyp geçýän Garagum derýasynyň kenarlaryny berkitmek, meliorasiýanyň döwrebap we häzirki zaman usullaryny ulanmak, gidrotehniki desgalaryň işini kämilleşdirmek, suw akymynyň kadaly bolmagyny üpjün etmek boýunça zerur tagallalar edilýär.
