Volvo brendiň model hataryna belli bir derejede özboluşlylyk goşjak batareýa bilen işleýän sportkar döretmegi göz öňünde tutýar. Kompaniýanyň müdiri Býorn Annwallyň aýtmagyna görä, täze flagman awtomobil öndüriji üçin örän möhümdir diýip, autonews.ru belleýär.
Heniz 2021-nji ýylda Volvo P1800 Cyan awtomobilini hödürledi. Awtomobiliň kuzowy 1961-nji ýylyň meşhur P1800 kupesiniň stilinde döredildi. Elbetde, dikeldilip, kämilleşdirilen sportkaryň tehniki bölegi doly derejede özboluşlydy. Mysal üçin, iki litrlik 420 at güýji bolan turbo hereketlendirijisi Cyan Racing zawod topary tarapyndan işlenip düzülen Volvo S60 TC1 ýaryş sedanyndan alyndy. Güýç enjamy Holinger-iň bäş basgançakly mehaniki herekete getiriji gutusy bilen birleşdirildi.
Şeýle-de bolsa, häzirki wagtda Volvo üçin esasy ugur kompaniýanyň esasy girdejisini emele getirýän krossowerlerdir. Awtoöndüriji täsirli we ekzotik ulaglary döretmekden ýüz öwürmeýär, ýöne häzir esasy üns diňe has girdejili modellere gönükdirilýär. Ýöne eger täze sportkaryň üstünde, hakykatdanam, işlenip başlansa, güýç gurluşynyň elektrik boljakdygyny bellemek gerek. Hiç hili içerki ýangyç hereketlendirijilerini hatda batareýalar üçin generator hökmünde-de ulanmak meýilleşdirilmeýär.
Ýatlap geçsek, brendiň soňky kupesi 2006-njy ýyldan 2013-nji ýyllar aralygynda çykarylan ikinji nesil Volvo C70 bolupdy.
