Şu gün, 2-nji fewralda Aşgabatda we ähli welaýatlarda Türkmenistanyň Oguz han adyndaky Inžener-tehnologiýalar uniwersiteti tarapyndan geçirilýän «Oguz hanyň zehinli nesilleri» atly olimpiadanyň I tapgyry badalga aldy.
Birinji tapgyra gatnaşan okuwçylara zehinlerini açyp görkezmekleri üçin Zehin soraglary (IQ test) berildi. Zehin soragynyň çözüliş usullary uniwersitetiň internet sahypasynda ýerleşdirilipdi. Şeýle hem olimpiadanyň başynda zehin soraglarynyň çözüliş usullary gaýtadan düşündirildi.
Öň habar berşimiz ýaly, olimpiadanyň I tapgyryna gatnaşmaga isleg bildiren 30 müňe golaý mekdep okuwçylary hasaba alyndy.
Olimpiadany guramaçylykly geçirmek üçin okuwçylaryň sanynyň köp bolandygyna garamazdan ýokary derejede taýýarlyk görüldi. Okuwçylaryň her haýsysyna aýratynlykda kodlar berlip, bäsleşigiň adalatly geçirilmegi üpjün edildi. Hasaba duran okuwçylaryň sanyna laýyklykda sorag kagyzlary bukja salnyp möhürlendi. Olimpiada tamamlanandan soň hem okuwçylaryň jogaplary bukja salnyp, mekdebiň möhüri bilen möhürlenip guramaçylyk toparyna ugradyldy.
