Türkmenistanyň Oguz han adyndaky Inžener-tehnologiýalar uniwersitetiniň ýurdumyzyň orta mekdep okuwçylarynyň arasynda «Oguz hanyň zehinli nesilleri» ady bilen geçirilýän olimpiadasynyň I tapgyryna gatnaşmaga isleg bildirip, hasaba alnan mekdep okuwçylarynyň sany 30 müňe golaýlady.
Guramaçylyk toparynyň bellemegine görä, munuň özi mekdep ýaşlarynyň döwlet derejesinde geçirilýän olimpiada gyzyklanmasynyň garaşylandan has-da köp bolandygyny görkezýär.
Aýratyn bellemeli zatlaryň biri hem hasaba alnan okuwçylaryň arasynda iňlis dili, tebigy we takyk ugurly dersler boýunça döwlet we halkara ders bäsleşiklerinde, şeýle-de taslama bäsleşiklerinde ýeňiji bolan okuwçylaryň sanynyň ýokary bolmagydyr. Olaryň käbirleri barada aýdyp geçsek, Fiso 2022, Stemco 2022, WICE Malaysia ýaly abraýly olimpiadalarda altyn, kümüş we bürünç medallara eýe bolan mekdep okuwçylarynyň gatnaşýanlygydyr.
Häzirki wagtda bu olimpiadany guramaçylykly geçirmek we adalatly baha bermek boýunça döredilen topar tarapyndan taýýarlyk işleri ýokary derejede alnyp barylýar.
Olimpiada baradaky maglumatlary, onuň düzgünnamasy, zehin soragy we onuň çözüliş usullary barada maglumatlary uniwersitetiň internet sahypasyndan alyp bilersiňiz.
