25-nji ýanwarda Türkmenistanyň Halk Maslahatynyň Başlygy Gurbanguly Berdimuhamedow Aşgabat şäheriniň töwerekleri boýunça iş saparyny amala aşyrdy. Onuň dowamynda suwuň ähmiýeti we Garagum derýasynyň hem-de beýleki akabalarynyň suwuny rejeli peýdalanmak, derýanyň kadaly akymyny üpjün etmek bilen baglanyşykly meseleler boýunça pikir alyşmalar boldy diýip, «Watan» habarlar gepleşiginde habar berildi.
Türkmen halkynyň Milli Lideri iş saparynyň dowamynda Garagum derýasynyň 798-nji kilometrliginde ýerleşýän köpriniň üstünde saklandy. Bu ýerde Ministrler Kabinetiniň Başlygynyň orunbasary, daşary işler ministri R.Meredow, Ahal welaýatynyň merkeziniň gurluşygy boýunça döwlet komitetiniň başlygy D.Orazow, Arkadag şäheriniň häkimi Ş.Durdylyýew we Aşgabat şäheriniň häkimi R.Gandymow, şeýle hem «Altkom» jogapkärçiligi çäkli jemgyýetiň ýolbaşçysy A.Tislenko hem-de «Interbudmontaž» gurluşyk assosiasiýasynyň baş direktory W.Petruk, başga-da birnäçe wekiller boldular.
Türkmenistanyň Halk Maslahatynyň Başlygy häzirki döwürde ýurdumyzda suw serişdelerini rejeli peýdalanmak, suwaryşyň täze usullaryny giňden ornaşdyrmak, meselelerine zerur üns berilýändigini belledi.
Garabogaz köl aýlagynyň üstünden geçýän köpriniň gurluşygyny ynanylan «Altkom» jogapkärçiligi çäklendirilen jemgyýetiň ýolbaşçysy häzirki döwürde ýerine ýetirýän işleriniň netijeleri, «Interbudmontaž» gurluşyk assosiasiýasynyň ýolbaşçysy bolsa ýurdumyzda gurlan lagym ulgamlarynyň işleýiş derejesi barada maglumat berdiler.
Gurbanguly Berdimuhamedow gyş günleriniň dowam edýän pursatlarynda Garagum derýasynyň we beýleki akabalarynyň kä ýerlerinde buz gatlaklarynyň emele gelendigini belläp, derýalaryň kenarlaryny berkitmek, kadaly suw akymlaryny üpjün etmek meselelerine örän jogapkärçilikli çemeleşilmelidigini aýtdy.
