Russiýa Aurus awtoulaglaryny türkmen bazarynda tanatmagy göz öňünde tutýar. Muny Rus-türkmen işewürler forumyna gatnaşýan Tatarystanyň wise-premýeri — Respublikanyň senagat we söwda ministri Oleg Korobçenko habar berdi diýip, Interfaks ýetirýär.
"Irden bu ýere - foruma gelýärkäk, “Mersedesleriň” uzyn kerweni yzymyzdan ýetdi. Gidip barşyma öz ýanymdan “Näme üçin bular “Mersedes” münýärkäler?” diýip pikir edýärin. Aurus-yň hili has gowy ahyry, özem importyň ýerini doly tutup biljek, Türkmenistana dostlukly ýurt bolan Russiýada öndürilýär. Ol ep-esli derejede gowy. Özüm-ä Aurus-yň tarapdary" – diýip, Korobçenko belleýär. Onuň bu sözlerini Orient habar agentligi getirýär.
Ol Tatarystana gaýdyp baransoň, Aurus öndürýän kärhananyň ýolbaşçylary bilen gürleşjekdigini aýtdy.
Korobçenko: "Biziň Türkmenistanyň ýolbaşçylary bilen duşuşmagymyz we olara ret edip bolmajak şeýle teklibi hödürlemegimiz gerek. Teklip ediljek biziň sedan klasly bronlanan we adaty Aurus awtoulaglarymyz bolar" - diýdi.
"Respublika indi täze Aurus “Komendant” ulaglaryny öndürip başlady, 28-nji fewralda Tatarystanda bu jipleriň tanyşdyrylyşy bolar" – diýip, ol sözüniň üstüni ýetirdi.
Aurus brendi "NAMI" Federal döwlet unitar kärhanasy tarapyndan 2012-nji ýyldan bäri döwletiň birinji ýolbaşçy adamlary üçin görnükli awtoulaglary döretmek taslamasy esasynda döredildi. Taslama "Ýeke-täk modul platformasy" diýlip atlandyryldy we soňra "Kortež" taslamasy hökmünde tanaldy. 2016-njy ýyldan bäri NAMI öz güýji bilen Aurus ulaglarynyň kiçi göwrümli önümçiligini alyp barýar.
