28-nji dekabrda Aşgabadyň günbatar künjeginde täze, döwrebap ýaşaýyş jaý toplumynyň, umumybilim berýän mekdebiň, çagalar bagynyň, söwda-dynç alyş merkeziniň we beýleki desgalaryň açylyş dabarasy boldy. Dabara Prezident Serdar Berdimuhamedow gatnaşdy.
Bu ýerde otaglarynyň ýerleşdirilişi gowulandyrylan 4 gatly ýaşaýyş jaýlarynyň 62-si guruldy. Olar 3064 maşgala üçin niýetlenendir.
Toplumyň çäginde şeýle hem 320 orunlyk umumybilim berýän mekdep, çagalar bagy, bazar we zerur bolan beýleki medeni-durmuş düzümleri, ýokary derejede enjamlaşdyrylan oýun we sport meýdançalary bar. Täze ýaşaýyş toplumynda Ulag ýollary, yşyklandyryş ulgamy çekildi, ýaş bag nahallary, dürli güller ekildi, gök zolaklar döredildi.
Täze ýaşaýyş toplumynda şeýle hem «Abadançylyk» söwda-dynç alyş merkezi bina edildi. Bu ýerde söwda zallarynyň 5-si, restoran, toý mekany, çaýhana we beýlekiler bar.
Dabaranyň çäklerinde Serdar Berdimuhamedow şanly waka mynasybetli bu ýerde guralan dabara gatnaşýan daşary ýurtlaryň Türkmenistandaky ilçileri we halkara guramalaryň wekilhanalarynyň ýolbaşçylary bilen gürrüňdeş bolup, olary Täze ýyl baýramy bilen gutlady we diplomatlara ýurdumyzyň durmuşynda möhüm ähmiýeti bolan dabaralara işjeň gatnaşýandyklary üçin minnetdarlyk bildirdi.
Belläp geçsek, paýtagtymyzyň günbatarynda döwrebap binalar toplumynyň düýbi 2018-nji ýylyň oktýabr aýynda il sylagly ýaşulularyň gatnaşmagynda tutuldy.
