26-njy dekabrda Prezident Serdar Berdimuhamedow Russiýa Federasiýasyna iş saparyny amala aşyryp, her ýyl Sankt-Peterburg şäherinde geçirilýän GDA-nyň döwlet Baştutanlarynyň resmi däl sammitine gatnaşdy.
Sankt-Peterburgda Serdar Berdimuhamedow sapar mahaly özüniň kabulhanasy ýerleşýän «Astoria» myhmanhanasyna bardy.
GDA gatnaşyjy döwletleriň Baştutanlarynyň resmi däl duşuşygy B.N.Ýelsin adyndaky Prezident kitaphanasynda geçirildi. Sammite şeýle hem Azerbaýjan Respublikasynyň Prezidenti Ilham Aliýew, Ermenistan Respublikasynyň Premýer-ministri Nikol Paşinýan, Belarus Respublikasynyň Prezidenti Aleksandr Lukaşenko, Gazagystan Respublikasynyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow, Täjigistan Respublikasynyň Prezidenti Emomali Rahmon, Özbegistan Respublikasynyň Prezidenti Şawkat Mirziýoýew gatnaşdylar.
Ýokary derejedäki duşuşyk başlamazdan ozal, GDA gatnaşyjy ýurtlaryň Döwlet baýdaklarynyň öňünde Arkalaşygyň ýurtlarynyň döwlet Baştutanlarynyň bilelikdäki surata düşmek dabarasy boldy.
Gyzyklanma bildirilýän pikir alyşmalaryň dowamynda 2022-nji ýylda ýerine ýetirilen işleriň netijelerine garaldy we geljekki döwür üçin öňde durýan möhüm wezipeler kesgitlenildi.
Resmi däl ýagdaýda geçirilýän duşuşyk GDA döwletleriniň ýolbaşçylaryna umumy gyzyklanma bildirilýän halkara derejesindäki birnäçe meseleleri, özara gatnaşyklaryň ugurlaryny ara alyp maslahatlaşmaga mümkinçilik döretdi.
