Arkadag şäheriniň gurluşygynyň ikinji tapgyrynda gurmaga meýilleşdirilýän desgalar toplumynyň hatarynda iki gatly ýaşaýyş jaý toplumynyň, seýilgäh zolaklarynyň, häzirki zaman aragatnaşyk ulgamyna degişli döwrebap serişdeler zolaklarynyň, ýol hereketini statistika hasabatlaryny elektron ulgam arkaly tabşyrmagyň programma üpjünçiliginiň, elektron resminama dolanyşygy ulgamynyň merkezleri bar.
Bu desgalaryň şekil taslamalary bilen Gurbanguly Berdimuhamedow Arkadag şäherine amala aşyran nobatdaky iş saparynyň barşynda tanyşdy.
Bellenilişi ýaly, senagat maksatly desgalaryň gurluşygy ýurdumyzda durmuşa geçirilýän şähergurluşyk maksatnamasynyň esasy ugurlarynyň birine öwrüldi. Ýurdumyzy senagatlaşdyrmagyň çäklerinde täze merkezde ululy-kiçili önümçilik kärhanalary, aýratyn-da, gaýtadan işleýän önümçilikler dörediler. Munuň özi azyk howpsuzlygyny, degişli ekologiýa ýagdaýyny üpjün etmek bilen bir hatarda täze iş orunlarynyň döremegini, telekeçilik başlangyçlarynyň höweslendirilmegini üpjün eder.
Gurbanguly Berdimuhamedow şekil taslamalara birnäçe belliklerini aýtdy we degişli düzedişleri girizip, binalaryň gurluşygynda, ýol-ulag düzümine degişli desgalaryň işleýiş ulgamynda we önümçilik toplumlarynda häzirki zaman ýörelgelerine möhüm ähmiýet berilmelidigini belledi we bu işlere täzeçil çemeleşmeleriň zerurdygyna ünsi çekdi.
Türkmenistanyň Milli Geňeşiniň Halk Maslahatynyň Başlygy täze merkeziň ikinji tapgyrynyň desgalarynyň gurluşygyna başlamaga ak pata berip, bu işde häzirki zamanyň ösen tejribesiniň netijeli ulanylmalydygyny belledi.
