24-nji dekabrda Gurbanguly Berdimuhamedow Ahal welaýatynyň täze edara ediş merkezi bolan Arkadag şäherine nobatdaky iş saparyny amala aşyrdy. Saparyň barşynda Türkmenistanyň Milli Geňeşiniň Halk Maslahatynyň Başlygy şäheriň gurluşygynda alnyp barylýan işler bilen gyzyklandy. Şeýle hem Arkadag şäheriniň gurluşygynyň ikinji tapgyrynda bina edilmegi meýilleşdirilýän desgalaryň taslamalary bilen tanyşdy.
Ahal welaýatynyň merkeziniň gurluşygy boýunça döwlet komitetiniň başlygy D.Orazow we Arkadag şäheriniň häkimi Ş.Durdylyýew merkeziň çäklerinde alnyp barylýan köptaraply gurluşyk işleri barada hasabat berdiler.
Gurbanguly Berdimuhamedowyň garamagyna merkeziň gurluşygynyň ikinji tapgyrynda gurulmagy meýilleşdirilýän desgalaryň taslamalary hem-de olaryň ýerleşdiriljek ýerleriniň çyzgylary görkezildi.
Gurbanguly Berdimuhamedow merkezde şekil taslamalara birnäçe belliklerini aýtdy we degişli düzedişleri girizip, binalaryň gurluşygynda, ýol-ulag düzümine degişli desgalaryň işleýiş ulgamynda we önümçilik toplumlarynda häzirki zaman ýörelgelerine möhüm ähmiýet berilmelidigini belledi we bu işlere täzeçil çemeleşmeleriň zerurdygyna ünsi çekdi.
Türkmenistanyň Milli Geňeşiniň Halk Maslahatynyň Başlygy täze merkeziň ikinji tapgyrynda bina edilmegi meýilleşdirilýän dürli maksatly desgalaryň gurluşygyna başlamaga ak pata berip, bu işde häzirki zamanyň ösen tejribesiniň netijeli ulanylmalydygyny belledi.
