Serdar Berdimuhamedow Türkmenistanyň nebitgaz senagaty we geologiýa pudaklarynyň işgärlerini ýurdumyzda her ýyl uly dabara bilen bellenilýän hünär baýramy — Nebitgaz senagaty we geologiýa işgärleriniň güni bilen gutlady.
«Nebitgaz pudagy milli ykdysadyýetimiziň binýatlyk pudagydyr. Ýurdumyzyň mineral-çig mal serişdeler binýady, kuwwatly ýangyç-energetika senagaty we energiýa-ulag üpjünçilik ulgamlary Türkmenistany kuwwatly döwlet hökmünde dünýä tanadýar.
Şoňa görä-de, nebitgaz senagatyny ösdürmek ýurdumyzy ykdysady taýdan ösdürmegiň ileri tutulýan möhüm ugry bolmagynda galýar» — diýip türkmen Lideri belleýär.
Serdar Berdimuhamedow geljekde hem nebitgaz senagatynyň we geologiýa pudagynyň işgärleriniň öňde goýlan ähli wezipelere abraý bilen hötde geljekdiklerine berk ynanýandygyny belledi.
Türkmenistanyň Prezidenti nebitçilere, gazçylara we geologlara berk jan saglyk, abadan we bagtyýar durmuş, nebitgaz senagatyny ösdürmek ugrunda alyp barýan işlerinde rowaçlyklary arzuw etdi.
