Harby we hukuk goraýjy edaralaryň şu ýylyň on bir aýynda ýerine ýetiren işleriniň netijeleri baradaky mesele Türkmenistanyň Prezidenti Serdar Berdimuhamedow 8-nji dekabrda geçiren Döwlet howpsuzlyk geňeşiniň nobatdaky mejlisiniň gün tertibini düzdi.
Mejlisiň dowamynda Döwlet howpsuzlyk geňeşiniň agzalary ýolbaşçylyj edýän düzümlerinde ýerine ýetirilen işler barada hasabat bilen çykyş etdiler. Hususan-da, şu ýylyň sentýabr aýynda geçirilen harby-taktiki okuwlaryň netijeleri barada hasabat berildi. Şeýle hem Türkmenistanyň raýatlaryny Ýaragly Güýçlerden gullukdan boşatmagyň we harby gulluga çagyrmagyň barşy barada aýdyldy.
Türkmenistanyň Baş prokurory käbir ýolbaşçylaryň we işgärleriň wezipe ygtyýarlyklaryndan hyýanatçylykly peýdalanyp, döwlete aýratyn uly möçberde zyýan ýetirmekleri, şeýle hem para almaklary bilen baglanyşykly jenaýatçylykly etmişleriň ýüze çykarylandygyny habar berdi.
Bellenilişi ýaly, aýyplanýanlaryň jenaýatçylykly ýol bilen gazanan bikanun girdejileri, kazyýetiň hökümi bilen, ýetirilen zyýanyň öwezini dolmak we bikanun baýamagyň närsesi hökmünde döwletiň haýryna geçirildi.
Serdar Berdimuhamedow korrupsiýa bilen bagly hukuk bozulmalaryna ýardam edýän sebäpleri we şertleri aradan aýyrmaga, olaryň netijelerini ýok etmäge gönükdirilen anyk çäreleri kesgitlemek boýunça zerur işleri geçirmek babatda görkezme berildi.
Döwlet howpsuzlyk geňeşiniň mejlisinde başga-da birnäçe meselelere garaldy we olar boýunça degişli çözgütler kabul edildi.
