Türkmenistan we Russiýa Federasiýasy Ulag, üstaşyr we logistika meseleleri boýunça türkmen-rus bilelikdäki toparyny dörederler. Bu topar Türkmenistanyň Ministrler Kabinetiniň ýanyndaky Ulag we kommunikasiýalar agentligi bilen Russiýa Federasiýasynyň Ulag ministrliginiň arasynda ulag we üstaşyr çygrynda hyzmatdaşlyk barada düşünişmek hakynda Ähtnama laýyklykda hem-de ýolagçylary, ýükleri ikitaraplaýyn we üstaşyr gatnatmak, logistikany ösdürmek, onuň netijeliligini ýokarlandyrmak maksady bilen dörediler.
Anna güni geçirilen Hökümet mejlisiniň barşynda Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew toparyň türkmen bölegini döretmek barada habar berdi.
Serdar Berdimuhamedow hasabaty diňläp, häzirki wagtda Türkmenistanyň we Russiýa Federasiýasynyň arasyndaky dost-doganlyk, hoşniýetli goňşuçylyk ýörelgelerine esaslanýan köptaraplaýyn gatnaşyklaryň uly üstünliklere beslenýändigini nygtady. Döwlet Baştutany ýurtlarymyzy baglanyşdyrýan ulag ugurlarynyň strategik ähmiýetine ünsi çekip, bilelikdäki giň gerimli düzümleýin taslamalary durmuşa geçirmegiň wajypdygyny nygtady. Türkmenistanyň Prezidenti üstaşyr ýük daşamalaryň möçberini artdyrmak maksady bilen, degişli çäreleri görmegiň möhümdigini belläp, agentligiň ýolbaşçysyna bu babatda birnäçe anyk tabşyryklary berdi.
